எல்லாம் வந்தது

உதயசங்கர்

 

தாந்தோன்றிப் பாதை மறைந்து

தார்ச்சாலை வந்தது

ஒரு வழிப்பாதை போய்

நால்வழிச் சாலை வந்தது

கால்நடையாய் நடந்த தூரம்

கார் கணத்தில் கடந்தது

கருத்த முகங்களில் எல்லாம்

வெண்மை நிறப்பூச்சாயிருந்தது

சினிமா பார்க்கக் காத்திருந்த காலம் போய்

வீட்டில் சினிமா காத்திருந்தது

கம்பு கேப்பை சோளம் போய்

பீட்சா பர்கர் வந்தது

உள்ளூர் பானங்கள் தொலைந்து

கோகோ பெப்சி நுரைத்தது

உலகம் எல்லாம் ஊருக்குள் வந்தது

எப்படி எப்படி எப்படியென்று

அண்ணாந்து வியந்த

ஆறுமுகத்துக்கு நடக்கும்போது

காலில் சங்கிலி ஓசை

கேட்டுக் கொண்டிருந்தது மட்டும்

ஏனென்று புரியவில்லை.