Wednesday 19 September 2012

செம்போத்தின் செய்தி

உதயசங்கர்

Apophysis-110211-42_modern_art

காரணம்

அவர்களுடைய பார்வை வேறெங்கும்

பாயாமலிருக்க

கண்களில் பட்டை கட்டியிருக்கிறார்கள்

ஒரு வழி தான் தெரியும்

காரணம்

அவர்களுடைய காதுகளில் வேறெதுவும்

கேட்காமலிருக்க

இயர் ஃபோன் மாட்டியிருக்கிறார்கள்

ஒரு வார்த்தை தான் கேட்கும்

காரணம்

அவர்களுடைய வாயில் வேறெந்த சொற்களும்

வந்து விடாமலிருக்க

நுனி நாக்கில் கொக்கி மாட்டியிருக்கிறார்கள்

ஒரு சொல் மட்டுமே பேசும்

காரணம்

அவர்களுடைய கால்கள் வேறெங்கும்

போய்விடாமலிருக்க

மற்றெல்லா திசைகளையும் மறைத்து விட்டார்கள்

ஒரு திசைவழியே நடக்கும்

காரணம்

அவர்களுக்கு வேண்டுவதெல்லாம்

அதிகாரம்

இப்புவியில் ஒரு சிறு உயிரும்

அவர்கள் தயவின்றி

உயிர்வாழ முடியாமல் செய்யும்

வானளாவிய  அதிகாரம்.

ஆனால்

ஒரு அதிகாலைசெம்போத்து

அவர்களைப் பார்த்து

கூக்கூகூகூகூ என்கிறது.

No comments:

Post a Comment