விலகிப் போய்..

விலகிப் போய்க் கொண்டிருக்கிறாய் நீயென

எனக்குத் தெரியும்

மரத்துப் போகச் செய்யும் உன் கை விரல்களின்

குளிர்மை கிசுகிசுத்தது ரகசியமாய்

உன் இலக்குகள் மாறி விட்டன

என்னைக் கடந்து செல்லும்

உன் பார்வைக் கோடுகளின் தடம்

ஊர்ந்தலைகிறது ஒரு பூரானைப் போல

உன் பயணத் திசையில்

எனக்கான நிறுத்தம் எதுவுமில்லை

இத்தனைக்கும் பிறகு

உன்னை விட்டு விலகிட

நானும் அந்தரங்கமாய் ஆசைப் படுகிறேன்

சிலவேளை

என் நினைவுகளில் குரோதத்தின் சிறுவிதை

முளை விட்டிருந்தால்

என் கனவுகளில் துரோகத்தின் கரும்விஷம்

சுரந்திருந்தால்

என் இதயத்தில் கைவிடப்படுதலின்

கூர்வாள் குத்திக் கிழித்திருந்தால்

எல்லாம் எனக்கும் சுலபமாக இருந்திருக்கும்